கோவிட்-19 வைரஸ் இற்கான தடுப்பு மருந்து பொதுமக்களின் பாவனைக்கு எதிர்வரும் செப்ரம்பர் மாதம் வந்துவிடும் என ஒக்ஸ்போட் பல்கலைக்கழகத்தின் வைரஸ் தொடர்பான ஆய்வுப் பேராசிரியர் சார கில்பேட் பி.பி.சி செய்தி நிறுவனத்திற்கு தெரிவித்துள்ளார்.

இந்த மருந்தின் உற்பத்தி வடிவமைப்பு நிறைவடைந்துவிட்டது, அதனை மனிதர்களில் பரிசோதனை செய்யும் நடவடிக்கைகளை நாம் விரைவில் ஆரம்பிக்கவுள்ளோம்.

அதன் பின்னர் அதனை மிக அதிக அளவில் உற்பத்தி செய்யும் பணிகள் ஆரம்பிக்கப்படும். பரிசோதனைகளை மேற்கொள்ளாது உற்பத்தியை ஆரம்பிக்க முடியாது. அது மனிதர்களுக்கு விசத்தை கொடுப்பது போல ஆகிவிடும்.

எனினும் நாம் உற்பத்தியை ஆரம்பிக்கும் போது பில்லியன் கணக்கான மருந்துகளை விரைவாக உற்பத்தி செய்யும் நடவடிக்கைகளை மேற்கொள்ளவுள்ளோம் என அவர் மேலும் தெரிவித்துள்ளார்.

கடந்த 21 நாட்களாக கொரோனா தொடர்பில் முடக்கப்பட்டிருந்த யாழ்.தாவடிக்கிராமம் இன்று இயல்புநிலைக்கு திரும்புகிறது.யாழ்குடாநாட்டில் முதல் கொரோனா வைரஸ் தொற்றுக் குள்ளான நபர் வசித்த கிராமம் என்பதலால் இந்த கிராமம் சுகாதாரத் துறையினரின் அறிவுரைக்கேற்ப தனிமைப்படுத்தப்பட்டிருந்த்து.

முடக்கப்படிருந்த தாவடிக் கிராமம் கொரோனா தொற்று இல்லாத பிரதேசமாக சுகாதாரத் துறையினரால் உறுதிப்படுத்தப்பட்டு அங்குள்ள மக்கள் பாதுகாப்பாக நடமாட அனுமதிக்கப்பட்டனர்.

யாழ்ப்பாணம் தாவடியைச் சேர்ந்த குடும்பத்தலைவர் கடந்த மார்ச் 22ஆம் திகதி கொரோனா வைரஸ் தொற்றால் பாதிக்கப்பட்டதாக அடையாளம் காணப்பட்டார்.

அன்றைய தினத்திலிருந்து அவரது வதிவிடத்தைச் சூழவுள்ள கிராமம் சுகாதாரத் துறையினரால் இராணுவம் மற்றும் பொலிஸாரின் ஒத்துழைப்புடன் முடக்கப்பட்டது. அந்தக் கிராமத்தைச் சேர்ந்தவர்கள் வீடுகளில் சுயதனிமைப்படுத்தலுக்கு உள்படுத்தப்பட்டனர்.

கொரோனா தொற்றால் பாதிக்கப்பட்டவருடன் நெருக்கமாகப் பழகியவர்கள் பரிசோதனைக்கு உட்படுத்தப்பட்டனர். அவர்கள் எவருக்கும் தொற்று இல்லை என்பது உறுதி செய்யப்பட்டது.

இந்த நிலையில் நாட்டின் தனிமைப்படுத்தல் விதிகளுக்கு அமைய 21 நாள்களின் பின்னர் தாவடிக் கிராமம் இன்று சுகாதாரத் துறையினரால் விடுவிக்கப்பட்டது.

தற்போது அமுலில் இருக்கும் ஊரடங்குச் சட்டமானது புத்தாண்டுக்குப் பின்னர் தெரிவு செய்யப்பட்ட 12 மாவட்டங்களிலிருந்து நீக்குவதற்கு அரசாங்கம் ஆலோசனை செய்து வருவதாக அரசாங்கத்தினை மேற்கோள்காட்டி தகவல்கள் வெளியாகியுள்ளன.

குறிப்பாக, அம்பாந்தோட்டை, நுவரெலியா, மாத்தளை, அம்பாறை, திருகோணமலை, மொனராகலை, அனுராதபுரம், வவுனியா, பொலன்னறுவை, முல்லைத்தீவு, மன்னார் மற்றும் கிளிநொச்சி ஆகிய மாவட்டங்களில் இவ்வாறு ஊரடங்கு நீக்கப்படும் என தெரிவிக்கப்படுகிறது.

மேற்படி மாவட்டங்களில் கொரோனா வைரஸ் நோயாளர்கள் கண்டுபிடிக்கப்படாமையே இதற்கு காரணத்தின் அடிப்படையில் இந்த முடிவுக்கு அரசாங்கம் வந்திருப்பதாக தகவல்கள் தெரிவிக்கின்றன.

அதேபோன்று, கொழும்பு மாவட்டத்தில் உள்ள பாதுக்க, சீதாவக்க மற்றும் கம்பஹா மாவட்டத்தில் பியகம ஆகிய பிரதேச செயலகப் பிரிவுகளிலும் ஊரடங்கு சட்டம் நீக்கப்படும் என எதிர்பார்க்கப்படுகிறது.

முன்னதாக குறிப்பிட்ட சில பிரதேசங்களில் பகுதி பகுதியாக ஊரடங்குச் சட்டம் நீக்கப்படும் என்று பசில் ராஜபக்ச தெரிவித்திருந்தமை குறிப்பிடத்தக்கது.

கொரனா வைரஸ் தொடர்பில் மட்டக்களப்பு மாவட்டத்திலான தீர்மானங்கள் எடுக்கும் கூட்டங்களில் எதிலும் பிரதேச சபையின் தவிசாளர்கள் எவரும் அழைக்கப்படுவதில்லை.பிரதேச செயலாளர்கள்,உள்ளுராட்சிமன்ற உதவி ஆணையாளரைக்கொண்டு தீர்மானங்களை எடுப்பதை மட்டக்களப்பு மாவட்ட பிரதேசசபை தவிசாளர்கள் ஒன்றியம் வன்மையாக கண்டிப்பதாக மட்டக்களப்பு மாவட்ட பிரதேசசபைகளின் ஒன்றியத்தின் செயலாளரும் மண்முனைப்பற்று பிரதேசசபையின் தவிசாளருமான சோ.மகேந்திரலிங்கம் தெரிவித்தார்.

மட்டக்களப்பு மாவட்ட பிரதேசசபை தவிசாளர்கள் ஒன்றியத்தின் விசேட கூட்டம் நேற்று மண்முனைப்பற்று பிரதேசசபையின் ஒன்றுகூடல் மண்டபத்தில் நடைபெற்றது.

மட்ட மட்டக்களப்பு மாவட்ட பிரதேசசபை தவிசாளர்கள் ஒன்றியத்தின் தலைவரும் மட்டக்களப்பு தென் மேற்கு பிரதேசசபையின் தவிசாளருமான என்.புஸ்பலிங்கம் தலைமையில் இந்த கூட்டம் நடைபெற்றது.

இந்த கூட்டத்தில் மட்டக்களப்பு மாவட்டத்தில் உள்ள பிரதேசசபைகளின் தவிசாளர்கள் கலந்துகொண்டனர்.

இதன்போது கொரனா அச்சுறுத்தல் நிலவும் இக்காலப்பகுதியில் பிரதேசசபைகளினால் முன்னெடுக்கப்படும் செயற்பாடுகள் மற்றும் பொதுமக்களுககு வழங்கும் வேலைத்திட்டங்கள் குறித்து இதன்போது ஆராயப்பட்டது.

அதனை தொடர்ந்து இக்கூட்டத்தில் எடுக்கப்பட்ட தீர்மானங்கள் குறித்து மட்டக்களப்பு மாவட்ட பிரதேசசபைகளின் ஒன்றியத்தின் செயலாளரும் மண்முனைப்பற்று பிரதேசசபையின் தவிசாளருமான சோ.மகேந்திரலிங்கம் ஊடகங்களுக்கு கருத்து தெரிவித்தார்.

பிரதேசசபை தவிசாளர்களின் அதிகாரம் தொடர்பாக 2020ஆம் ஆண்டு மார்ச் மாதம் 25ஆம் திகதி வெளியிடப்பட்ட அதிவிசேட வர்த்தமானியின் அடிப்படையில் முறையான அதிகாரிகள் என்பது அந்ததந்த பிரதேசங்களில் உள்ள பிரதேசசபைகளின் தவிசாளர்கள் என்பது தெளிவாக அறிவிக்கப்பட்டுள்ளது.

எனினும் கொரனா வைரஸ் தொடர்பாக மாவட்ட மட்டத்தில் தீர்மானங்கள் எடுக்கும் கூட்டங்களில் எதிலும் பங்குகொள்வதற்காக அழைக்கப்படவில்லையென்பதுடன் பிரதேச செயலாளர்கள்,உள்ளுராட்சி உதவி ஆணையாளர் உட்பட்ட அரச அதிகாரிகளைக்கொண்டு மாவட்ட மட்டத்தில் தீர்மானங்கள் எடுப்பதை மட்டக்களப்பு மாவட்ட பிரதேசசபையின் தவிசாளர்கள் ஒன்றியம் என்ற வகையில் நாங்கள் வன்மையாக கண்டிக்கின்றோம்.

எமது மக்களுக்காக இருபத்திநான்கு மணி நேரமும் களத்தில்நின்று ஒவ்வொரு பிரச்சினைக்கும் முகம்கொடுத்து அப்பிரச்சினைகளை தீர்ப்பதற்காக இரவு பகல் பாராது செயற்பட்டுவரும் மாவட்ட பிரதேசசபை தவிசாளர்களாகிய நாங்கள் மக்கள் தொடர்பான தீர்மானங்கள் எடுப்பதில் எவ்வித பங்களிப்பினையும் செய்யாத இக்கட்டான நிலைக்கு மாவட்ட நிர்வாகத்தினால் முன்னெடுத்துசெல்லப்படுவதை வன்மையாக கண்டிக்கின்றோம்.

பிரதேச செயலகங்கள் ஊடாக மாவட்ட செயலகத்தில் கலந்துரையாடி எடுக்கப்படும் தீர்மானங்கள் உள்ளுராட்சி உதவி ஆணையாளரினால் பிரதேசபையின் செயலாளர்களுக்கு முகவரியிடப்பட்டு அனுப்பிவைக்கப்படுகின்றபோது அவற்றினை செயற்படுத்துகின்ற விதத்தில் மக்கள் நலன் கருதுகின்றவர்கள் என்ற வகையில் பொறுiமையுடன் அந்த தீர்மானங்களை செயற்படுத்திவந்தோம். ஆனால் தொடர்ந்து தவிசாளர்கள் புறக்கணிக்கப்படுகின்ற நிலையில் மாவட்ட செயலக தீர்மானங்களை செயல்படுத்துவதில் நாங்கள் பாரிய இடர்பாடுகளை எதிர்கொள்கின்றோம். மக்களின் கேள்விகளுக்கு எங்களால் பதிலளிக்கமுடியாதநிலையேற்படுகின்றது.

இந்த அடிப்படையில் அதிவிசேட வர்த்தமானியின் அடிப்படையில் தனிப்படுத்தல் ஓழுங்குவிதிகள் ஒழுங்குபடுத்தல் முறையான அதிகாரி என்ற வகையில் பிரதேசசபையின் தவிசாளர்கள் அங்கீகரிக்கப்பட்டு அவர்கள் ஊடாகவே தனிமைப்படுத்தல்ääநிவாரணம் வழங்கல்,தொற்று நீக்கல் உட்பட சகல விடயங்களும் கையாளப்படவேண்டும் என தவிசாளர்கள் ஒன்றியம் தீர்மானம் எடுக்கின்றது.

மற்றும் அனைத்து அரசுசார்,அரசசார்பற்ற நிவாரணங்களும் பிரதேச செயலகத்தினால் வழங்கப்படுகின்றபோது அதில் ஏற்படும் சரிபிழைகள்,பொருத்தப்பாடு அற்ற செயற்பாடுகள்,எமது தவிசாளர்களினால் சுட்டிக்காட்டப்பட்டு அந்த தவறுகள் நிவர்த்திக்கப்படவேண்டுமாகவிருந்தால் பிரதேச செயலாளர்கள் பிரதேசசபை தவிசாளர்களுடன் கலந்துரையாடவேண்டும்.

எமது பகுதிகளில் உள்ளுர் உற்பத்திகள் போதியளவு உள்ளபோதிலும் வெளியிடங்களில் இருந்து மரக்கறி மற்றும் அதனோடினைந்த பொருட்களை கொண்டுவருவதன் மூலம் எமது உள்ளுர் உற்பத்தியாளர்கள் பாதிக்கப்படுவதோடு தமது உற்பத்திகளை சந்தைப்படுத்துவதிலும் திண்டாடுகின்றனர்.இந்த நிலையினை நீக்குவதற்கு எமது மாவட்ட உள்ளுர் உற்பத்திகளை கொள்வனவு செய்து மாவட்டத்திற்குள்ளும் வெளியிலும் விநியோகம் செய்ய மாவட்ட செயலகம் நடவடிக்கையெடுக்கவேண்டும்.

மட்டக்களப்பு மாவட்டத்தினை சேர்ந்த பலர் தொழில்வாய்ப்புகளுக்காக மாவட்டத்திற்கு வெளியே சென்றவர்கள் உணவுமின்றி மிகவும் கஸ்டமான நிலையில் உள்ளதாக தெரியவருகின்றது.அவர்களை இங்கு கொண்டுவந்து அந்ததந்த பகுதிகளில் தனிமைப்படுத்தல்களை மேற்கொண்டு அவர்களை குடும்பத்துடன் இணைப்பதற்கு உரிய நடவடிக்கைகளை மாவட்ட செயலகம் மேற்கொள்ளவேண்டும் என கேட்டுக்கொள்கின்றோம்.

வீட்டில் இருந்து பணி புரியும் காலமானது ஏப்ரல் மாதம் 20 ஆம் திகதி வரையில் நீடிக்கப்பட்டுள்ளதாக அரசாங்கம் அறிவித்துள்ளது.

அரச மற்றும் தனியார் துறையினருக்கு இந்த வாய்ப்பு வழங்கப்பட்டுள்ளது.

வீட்டில் இருந்து பணி புரியும் காலமானது விடுமுறை தினம் இல்லை எனவும் அரச மற்றும் தனியார் துறை பிரதானிகளின் அறிவுரைக்கு அமைய முடிந்தளவு வீட்டில் இருந்தவாறு வேலை செய்யுமாறும் தெரிவிக்கப்படுகின்றது.

சுகாதாரம், வங்கி, போக்குவரத்து மற்றும் அத்தியவசிய சேவைகள் தவிர்ந்த ஏனைய தரப்பினருக்கு இவ்வாறு வீட்டில் இருந்து பணி புரிய முடியும் என தெரிவிக்கப்படுகின்றது.